«Høvding» og «bauta» blei Berge Furre kalla då han døydde i 2016, 78 år gammal. Landet rundt mante minneorda fram den skjegløygde SV-leiaren, historikaren og presten, kjend
gjennom debattar, pensumbøker og preiker over eit halvt hundreår.
Nekrologane vektla den stabile og trygge Furre, men då det omfattande arkivet hans blei opna for biografen, såg ho at dette bildet måtte brytast opp.
Kristentru, sosialisme, målsak og fredssak prega Berge Furres liv, men biografen syner oss også prestestudenten som miste trua. Vi blir kjende med fredsvenen som hamna i naiv beundring for DDR. Kampen mot EU gjorde han til folketalar, avsmaken mot jappetida førte han tilbake til kyrkja. Som stortingsmann for SV kjempa Furre fram tverrpolitisk semje om betre bondekår, men han skapte splid med lovbrot og risikerte riksrett då han offentleggjorde hemmelegstempla dokument om amerikanske militære peilestasjonar i Noreg.
I biografien om Berge Furre og hans tid trer eit undrande, intenst, rastlaust og strategisk handlande menneske fram. Omdiskutert til det siste. Ein mann i rørsle, eit levande menneske.
Sitat frå melding
«et fascinerende bilde av norsk politikk, kirkeliv og allminnelig offentlighet gjennom andre halvdel av det 20. århundre.» - Sven Egli Omdal, Stavanger Aftenblad «framifrå biografihandverk» - John Peter Collett, Dag og Tid «Et stykke biografi av de sjeldne. [...] Furres minne og hans betydning for norsk samfunnsliv kunne ikke ha blitt skildret bedre. [...] en spennende og medrivende bok som leseren får mye utbytte av å lese.» - Magnus Akselberg Iversen, Altinget.no
