Forfattarskulen for skrivande med minoritetserfaring

Drøymer du om å gi ut bok? Har du lyst til å utvikle deg som skrivande i fellesskap med andre som skriv? Da bør du søke om å delta på neste års Forfattarskule for skrivande med minoritetserfaring.

Forfattarskulen er eit eittåring kurs med fem helgesamlingar. Kurset er gratis for dei ti som blir valde ut. Reise og opphald blir dekt. Og du får møte gjestelærarar som er blant våre fremste forfattarar.

Forfattarskulen starta opp i 2022 og er eit samarbeid mellom Det Norske Samlaget og Minotenk. Vi vil lage ei ramme rundt skrivinga som gir lyst og motivasjon til å skrive vidare. Du får møte andre skrivande, og får lære om alle hovudsjangrane gjennom engasjerande foredrag og skriveverkstadar. Du får også moglegheit til å vidareutvikle eigne skriveprosjekt og få tilbakemelding mellom samlingane.

Den overordna målsettinga er å skape eit større litterært mangfald og å motivere fleire til å delta i den offentlege samtalen. Forfattarskulen er for skrivande med minoritetserfaring. Som søkar må du vere over 18 år og ikkje vere etablert forfattar.

Søknaden skal innehalde eit brev der du fortel litt om deg sjølv, bakgrunnen din og motivasjonen for å søke. I tillegg ber vi om ein sjølvskriven tekst på nynorsk på 5–10 sider. Teksten kan vere skjønnlitterær eller dokumentarisk (t.d. dikt, kortprosa, novelle, utdrag frå større manus, barnebok).

Nynorsk vil bli arbeidsspråk gjennom kurset, men vi forventar ikkje at du har eit feilfritt nynorsk. Vi er opne for søknader både frå dei som allereie har nynorsk som skriftspråk, og frå dei som er meir ustø i nynorsk, men som har eit ønske om å arbeide litterært med nynorsk som sitt skriftspråk.

Nokre eksempel på kva vi legg i omgrepet «minoritetserfaring»: nasjonale minoritetar, skrivande med funksjonsnedsetjing eller funksjonsvariasjon, kjønnsminoritetar, skrivande med samisk bakgrunn, fleirkulturell bakgrunn eller innvandrarbakgrunn. 

Frå 2022 til 2024 har Forfattarskulen hatt mellom anna desse forfattarane som gjestelærarar og foredragshaldarar: Nina Grünfeld, Camara Lundestad Joof, Brynjulf Jung Tjønn, Marta Breen, Demian Vitanza, Fatemeh Ekhtesari, Yohan Shagmugaratnam, Nadia Ansar og Fredrik Høyer.

Søknadsfrist: 4. november kl. 23.59.

Send søknad til forfattarskulen@samlaget.no.

For spørsmål, kontakt Therese Tungen t.tungen@samlaget.no eller forfattarskulen@samlaget.no.