Ei bok som tek det turbulente og litt såre ungdomslivet på kornet.
16-årige Anette som hovudperson er skuleflink, opprørsk og forelska, og bur i den mest avsidesliggjande bygda på ei øy. Her finst eit busskur, men bussane går ikkje lenger. Anette og venninna sit der dagleg likevel og let praten og tida gå. Anette har moped, og det same har sjølvsagt Bobby. Han er 18 og har dei vakraste, brune auge. Symjelæraren overtalar Anette til å begynne på symjetrening, og der melder også Bobby seg! Det er ei frisk og overtydande skildring Ingelin Røssland leverer i si andre bok. Ho fekk fine kritikkar då ho debuterte med ungdomsromanen Viss du vil (1998). Frå 14 år og oppover.
