Dagbok 1924-1994. Bd. 1-5

Olav H. Hauge

I 84 hefte - frå mars 1924 då han var 15 1/2 år til mai 1994 veka før han døydde - førte Olav H. Hauge dagbok. Med eit tidsspenn på 70 år og eit omfang på 4000 sider er Hauges litterære dagbok også i fysisk forstand blant dei mest omfattande i verdslitteraturen.

Dei fem banda blir utgitt samla, og er ei eineståande kjelde til livet og diktinga til denne eminente poeten. Naturleg nok skriv diktaren mest om litteratur, men refleksjonane om poesi spesielt og dikting og diktarar generelt er iblanda små og store hendingar frå kvardags- og arbeidsliv, om folk i Ulvik i Hardanger og dei han elles møter kring i landet, om veret, landskapet, språket, reiser i inn- og utland, politiske hendingar på riks- og lokalplan.

I dagbøkene vrimlar det av sentensar og sitat, mange av dei på svensk, engelsk, tysk og fransk, men Hauge har også forma hundrevis av eigne aforismar og fyndord. I tillegg er her mange diktutkast og dikt som aldri før har stått på prent.

Dagbøkene inneheld fleire vitnemål om at dei er skrivne med tanke på at dei skal utgivast, og Hauge kommenterer dagboksjangeren generelt, talrike diktarbiografiar og sjølvbiografiar, og kva ein risikerer, ofrar og eksponerer i slike verk.

Av dei 3500 personane som er omtalte, høyrer brorparten bokverda til, og Hauge røper med glede at han også las hyllemeter med romanar, filosofi og annan sakprosa.

Først og fremst gir dagbøkene eit fascinerande innsyn i korleis denne diktarhovdingen orienterte seg i verdspoesien, og her vrimlar det av tankar og kritiske refleksjonar om vanskane med å gjendikte verdslyrikken til eit anna språk.

Dagbøkene blir utgitt praktisk talt uavkorta, og under redigeringa har det vore spesielt viktig å vere lojal mot Hauges eiga rettskriving.

For mange vil Ulvik-diktaren vere mest kjend frå talrike korthogne og ordknappe dikt, men med dagbøkene får både lek og lærd eit eineståande høve til å bli kjend med 4000 sider med Hauges meisterleg gjennomførte prosastil.

Litteraturprofessor Atle Kittang har skrive innleiinga til dette eineståande verket. Band 5 inneheld eit namneregister.

"Et funn for forskere, en nøkkel til dikterens verden og en leser- glede for alle oss andre. "

Arne Dvergsdal, DagbladetLes heile meldinga

ISBN: 9788252155181

Kategoriar: Olav H. Hauge

Emneknagg:

Sjanger: Verk



Meir frå Olav H. Hauge