Korleis skal ein oppføre seg i ei verd der alle verkar normale? Der ingen synest det er rart at folk bur på gata, men synest det er veldig rart å sende kjærleiksbrev til ein vaksen vikar? Og korleis veit ein kva ein skal gjere når folk seier eit forbode ord? Dette er berre nokre av spørsmåla 11 år gamle Juri plutseleg må finne ut av.
Gjennom dei to tidlegare bøkene Passe happy og Flokken har vi blitt kjende med Juri. Han er ein undrande, søkande og fabulerande gut som prøver å finne ut kven han er, og navigere i den merkelege verda.
I Raringen møter vi Juri igjen i ulike kvardagslege situasjonar, som gjennom hans blikk får eit nærmast magisk preg. Kari Stai skriv med finkjensle og varsemd, men også med humor om ein gut som kjenner seg litt annleis. Boka er illustrert av forfattaren sjølv.
Sitat frå melding
«... nett dette uferdige får Kari Stai godt fram i denne tredje, frittståande samlinga med historier om Juri … det er slike kjenslemessige responsar denne fint avstemde barneboka legg opp til.» - Hadle Oftedal Andersen, Klassekampen
