Her kan du lese nyskrivne tekster frå tidlegare elevar ved Forfattarskulen for skrivande med minoritetserfaring og tankar dei har om skriving, lesing og året ved skriveskulen. Skulen er eit samarbeid mellom Minotenk og Det Norske Samlaget. Blir du nysgjerrig? Du kan lese meir om Forfattarskulen her. Skulen har søknadsfrist i november 2025. Viss du har spørsmål, så kontakt leiar Therese Tungen på t.tungen@samlaget.no. Denne gongen får du lese tekst frå Anker Eysajan.
Kven er du?
Eg heiter Anker og kom til Noreg for om lag ti år sidan. Fyrst budde eg i Stamsund i Lofoten i to og eit halvt år. Eg har også gått på skrivelinja på Buskerud Folkehøgskole.
Kva slags tekst har du skrive?
Teksten min er for barn. Eg er glad i barn. Dikta er henta frå mi fyrste bok, Ein måne i magen og andre dikt, som kjem ut på Samlaget hausten 2025, illustrert av Hilde Hodnefjeld.
Kanskje eit vanskeleg spørsmål, men kvifor skriv du?
Grunnen til at eg skriv, er at eg vil lære ord og setningar. Eg prøver meg fram på nynorsk så godt eg kan. Målet er å lære språk gjennom skriving. Eg er glad i ord og leiker med språket.
Og kva liker du å lese?
Eg liker å lese barnebøker. Gutta i trehuset av Andy Griffiths og Kokotopia av Simon Stranger, og nokre av David Walliams sine barnebøker. Favorittforfattarane mine er Gro Dahle, Simon Stranger, Erlend Loe og David Walliams.
Er det noko ved Forfattarskulen du vil trekke fram som spesielt lærerikt for deg?
Eg lærte mange ord gjennom kvar samling og frå oppgåvene som andre elevar leverte, og frå alle lærarane. Det gjer meg glad, og eg takkar for det. Eg er glad for at eg fekk nye vennar.
Kor er ringane?
Ringar, ringar
på alle fingrar.
Eg er ein rik tjuv.
Eg er ein detektiv.
Nei, eg er kongen med krøllar
og mykje, mykje lommepengar.
Om morgonen finn eg ikkje ringane.
«Pappa pappa, kor er dei?
Har ringane mine venger?»
Å reia opp senga
«Du må bretta dyna di», seier mamma.
«Jepp.»
Eg sit oppå dyna
og byrjar å bretta.
«Mamma, mamma, sjå!
Dyna vil ikkje.
Ho geispar
og strekkjer beina sine.
Dyna vil berre sova.»
Kva et eit spøkelse?
«Spøkelset et brød»,
seier storebror.
«Feil!
Spøkelset et snø»,
seier eg,
«for det er kvitt.»
_
Klassen
Eg er lærar.
«Du må rydda», seier mamma.
Mamma er den høgaste,
mest bråkete
med dei største auga,
lengst hår,
den sintaste og suraste eleven eg nokosinne
har sett
i klassen.
Kart
Pappa kjøpte eit kart til meg.
Jippi!
No bur alle landa på rommet mitt.