Litteratur for barn og unge 2007

"Årboka er et verdifullt bidrag til barne- og ungdomslitteraturforskningen – en arena jeg ikke ser at vi kan klare oss uten."
Heidi Sævareid, barnebokkritikk.no

Åse Marie Ommundsen drøftar tendensar som knyter ungdomslitteraturen til ei seinmoderne livkjensle, og årbokas portrettsamtale med Sverre Henmo gir innsyn i vurderingar og val hos ein mangfaldig forfattar som ønskjer å kommunisere med unge lesarar. I ei større drøfting av faglitteraturen for ungdom ser Nina Goga nærare på systematiseringa av denne litteraturen. Nettopp mangfaldet i den gjer den vrien å plassera, og kanskje kan dette vere eit kvalitetsteikn.

Denne utgåva av årboka introduserer to nye faste postar. Den eine er "Nordiske nedslag”, der årboka denne gongen presenterer nye forfattarnamn og trendar i dansk og svensk barne- og ungdomslitteratur. Den andre er "Ny litteratur 2006", der lesarane får eit oversyn over viktige boktypar og enkeltbøker i året som gjekk. Årboka inneheld dessutan to artiklar om bildebøker, ein artikkel om suksess for norsk barnelitteratur i utlandet, eit intervju med avtroppande barnebokredaktør Guri Vesaas og essay av Einar Økland, Finn Øglænd og Bjørn Ingvaldsen.

Årboka Litteratur for barn og unge inneheld elles statistikk og fag- og forskingsbibliografi og er ei nyttig handbok for lærarar, studentar, bibliotekarar, kulturarbeidarar, litteraturskribentar, forfattarar og alle andre som arbeider med og interesserer seg for barne- og ungdomslitteratur.

Årboka Litteratur for barn og unge er eit forum for kritikk, forsking og formidling.

Redaktørar:

Per Olav Kaldestad har skrive fleire barne- og vaksenbøker. Han har i mange år arbeidd som norsklærar i lærarhøgskolen.

Karin Beate Vold har lang erfaring med forsking og formidling av barne- og ungdomslitteratur. Ho er direktør for Norsk barnebokinstitutt (NBI).